*காவிரி விவகாரத்தில் அடுத்தகட்ட நடவடிக்கை குறித்து முதல்வர் எடப்பாடி பழனிசாமியுடன் எதிர்க்கட்சித் தலைவர் மு.க.ஸ்டாலின் தலைமைச் செயலகத்தில் இன்று சனிக்கிழமை சந்தித்து ஆலோசனை நடத்தி வருகிறார். *

கர்நாடகாவில் மார்ச் 7-இல் அனைத்துக் கட்சி கூட்டம் நடைபெற உள்ள நிலையில், காவிரி மேலாண்மை வாரியம் அமைக்க மத்திய அரசை வலியுறுத்து குறித்து முதல்வருடன் எதிர்கட்சி தலைவர் ஸ்டாலின் ஆலோசனை நடத்தி வருவது தமிழக அரசியலில் முக்கியத்துவம் பெற்றதாக பார்க்கப்படுகிறது. 

இந்தக் கூட்டத்தில் பங்கேற்க மு.க.ஸ்டாலினுக்கு தொலைபேசி வாயிலாக முதல்வர் பழனிசாமி நேற்று வெள்ளிக்கிழமை அழைப்பு விடுத்தார்.

காவிரி மேலாண்மை வாரியம் அமைப்பதற்கு எதிர்ப்புத் தெரிவித்து கர்நாடகத்தில் முதல்வர் சித்தராமையா அனைத்துக் கட்சி கூட்டம் கூட்டியுள்ள நிலையில் முதல்வர் இந்த அவசர நடவடிக்கையை எடுத்துள்ளார்.

காவிரி நடுவர் மன்றத்தின் இறுதித் தீர்ப்பு தொடர்பாக நடைபெற்ற வழக்கில் உச்சநீதிமன்றம் அண்மையில் தீர்ப்பளித்தது. அதில், தமிழகத்துக்கு இதுவரை அளிக்கப்பட்ட வந்த 192 டிஎம்சி நீரில் இருந்து 14.75 டிஎம்சி நீரைக் குறைத்து அறிவித்தது. காவிரி மேலாண்மை வாரியத்தை 6 வாரங்களுக்குள் மத்திய அரசு அமைக்க வேண்டும் எனவும் உத்தரவிட்டது. 

உச்சநீதிமன்றத்தின் தீர்ப்பு தமிழகத்துக்கு பாதகமாக அமைந்துள்ளதாக அனைத்துக் கட்சிகளும் எதிர்ப்புத் தெரிவித்த நிலையில் முதல்வர் எடப்பாடி பழனிசாமி தலைமையில் தலைமைச் செயலகத்தில் கடந்த 22-ஆம் தேதி அனைத்துக் கட்சி கூட்டம் நடைபெற்றது. எதிர்க்கட்சித் தலைவர் மு.க.ஸ்டாலின் உள்பட அனைத்துக் கட்சித் தலைவர்கள் பங்கேற்றதுடன், விவசாய அமைப்புகளைச் சேர்ந்தோரும் கூட்டத்தில் பங்கேற்றனர்.

கூட்டத்தில், காவிரி மேலாண்மை வாரியத்தை 6 வாரங்களுக்குள் அமைக்க அனைத்துக் கட்சித் தலைவர்களுடன் முதல்வர் தில்லி சென்று பிரதமரை வலியுறுத்துவது என்பன உள்ளிட்ட மூன்று தீர்மானங்கள் நிறைவேற்றப்பட்டன. இந்தத் தீர்மானங்களை அனைத்துக் கட்சித் தலைவர்களும் வரவேற்றனர்.
பிரதமரிடம் வேண்டுகோள்: இந்நிலையில், தமிழக அரசின் மானியத்துடன் கூடிய இரு சக்கர வாகனங்கள் வழங்கும் விழா சென்னையில் கடந்த 24-ஆம் தேதி நடைபெற்றது. விழாவில் பிரதமர் நரேந்திரமோடியும் பங்கேற்றார். அப்போது முதல்வர் எடப்பாடி பழனிசாமி காவிரி மேலாண்மை வாரியத்தை உடனே அமைக்க வேண்டும் என வேண்டுகோள் விடுத்தார். ஆனால், நிறைவாகப் பேசிய பிரதமர் காவிரி மேலாண்மை வாரியம் அமைப்பது குறித்து கருத்து எதுவும் தெரிவிக்கவில்லை. 
அதன் பின், சென்னையில் நிகழ்ச்சியில் பங்கேற்ற நீர்வளத்துறை அமைச்சர் நிதின் கட்கரியிடம், உச்சநீதிமன்றத்தின் தீர்ப்பின் படி காவிரி மேலாண்மை வாரியத்தை 6 வாரங்களுக்குள் அமைக்க வேண்டும் என்று முதல்வர் நேரில் வலியுறுத்தினார்.

ஆனால், காவிரி மேலாண்மை வாரியத்தை அமைக்க குறிப்பிட்ட காலக்கெடு எதுவும் இதுவரை நிர்ணயிக்கவில்லை என்று சென்னையில் மத்திய அமைச்சர் நிதின் கட்கரி செய்தியாளர்களுக்குப் பேட்டி அளித்தார். அதேசமயம், அதற்கான நடவடிக்கைகளில் மத்திய அரசு ஈடுபட்டு வருவதாகவும் குறிப்பிட்டார். 
மத்திய அரசின் இந்த நடவடிக்கை தமிழகத்தில் உள்ள அரசியல் கட்சியினர் மத்தியிலும், விவசாயிகள் மத்தியிலும் பெரும் அதிருப்தியை ஏற்படுத்தியுள்ளது.
இதற்கிடையில், முன்னாள் பிரதமர் தேவெகெளடா காவிரி மேலாண்மை வாரியம் அமைக்கக் கூடாது என்று பிரதமரை நேரில் சென்று வலியுறுத்தப் போவதாக அறிவித்துள்ளார். 

அவசரக் கூட்டம்: இந்த நிலையில் தமிழக அரசும் துரிதமாகச் செயல்பட்டு அவசர நடவடிக்கைகளை எடுத்து வருகிறது. முதல்வர் எடப்பாடி பழனிசாமி வெள்ளிக்கிழமை காலை எதிர்க்கட்சித் தலைவர் மு.க.ஸ்டாலினை திடீரென தொலைபேசி வாயிலாக அழைத்து ஆலோசனை நடத்தினார். அதைத் தொடர்ந்து தலைமைச் செயலகத்தில் இன்று சனிக்கிழமை நடைபெறும் ஆலோசனைக் கூட்டத்திலும் பங்கேற்க ஸ்டாலினுக்கு முதல்வர் அழைப்பு விடுத்தார். அதன்படி, தலைமைச் செயலகத்தில் இன்று சனிக்கிழமை காலை 10.30 மணிக்கு கூட்டம் நடைபெற்றது. முதல்வர், துணை முதல்வர் ஓ.பன்னீர்செல்வம், எதிர்க்கட்சித் தலைவர் மு.க.ஸ்டாலின், துணைத் தலைவர் துரைமுருகன், சட்ட வல்லுநர்கள், நீர்பாசனத்துறை அதிகாரிகள் இந்தக் கூட்டத்தில் பங்கேற்று உள்ளனர். 

தீர்மானங்களில் மாற்றமா? 
பிரதமரை நேரில் சந்தித்து காவிரி மேலாண்மை வாரியம் அமைப்பது தொடர்பாக வலியுறுத்தப்படும் என அனைத்துக் கட்சி கூட்டத்தில் தீர்மானம் நிறைவேற்றப்பட்டது. இந்தத் தீர்மானத்தை நிறைவேற்றும் வகையில் மத்திய அரசு இதுவரை தமிழக அனைத்துக் கட்சிகளுக்கு நேரத்தை ஒதுக்கித்தரவில்லை. இதையடுத்து, ஏற்கெனவே, நிறைவேற்றப்பட்ட தீர்மானங்களில் எத்தகைய மாற்றங்களைக் கொண்டு வருவது, காவிரிப் பிரச்னையில் தமிழக அரசுக்கு முன்னுள்ள சட்ட வாய்ப்புகள் என்னென்ன என்பன உள்ளிட்ட பல்வேறு முக்கிய விஷயங்கள் தொடர்பாக சனிக்கிழமை நடைபெறவுள்ள ஆலோசனைக் கூட்டத்தில் விவாதிக்கப்படும் எனத் தெரிகிறது.

ஆரோக்கியமான அரசியல்
காவிரி விவகாரம் தொடர்பாக ஏற்கெனவே அனைத்துக் கட்சி கூட்டம் நடந்து முடிந்த நிலையில் இப்போது முதல்வரும் - எதிர்க்கட்சித் தலைவரும் சந்தித்து ஆலோசனை நடத்துவது ஆரோக்கியமான நடவடிக்கையாக அரசியல் வட்டாரத்தில் பார்க்கப்படுகிறது.

மார்ச் 7-இல் கர்நாடக அனைத்துக் கட்சிகள் கூட்டம்
காவிரி வழக்கில் உச்ச நீதிமன்ற வெளியிட்டுள்ள தீர்ப்பு குறித்து விவாதிக்க மார்ச் 7-ஆம் தேதி கர்நாடக அனைத்துக் கட்சிகள் கூட்டத்துக்கு கர்நாடக அரசு ஏற்பாடு செய்துள்ளது.

காவிரி ஆற்றுநீர்ப் பங்கீடு தொடர்பான வழக்கில் உச்ச நீதிமன்றம் தனது தீர்ப்பை பிப்.16-ஆம் தேதி வெளியிட்டது. அதில் கர்நாடகத்துக்கு கூடுதலாக 14.75 டிஎம்சி தண்ணீர் ஒதுக்கவும், அடுத்த 6 வாரங்களுக்குள் காவிரி மேலாண்மை வாரியம் அமைக்க வேண்டும் என்றும் குறிப்பிட்டிருந்தது.

இந்தத் தீர்ப்புக்கு வரவேற்பும், எதிர்ப்பும் எழுந்துள்ளது. தண்ணீர் ஒதுக்கீடு செய்தது மகிழ்ச்சி அளித்திருந்தாலும், காவிரி மேலாண்மை வாரியம் அமைக்க வேண்டும் என்ற உத்தரவை கர்நாடக அரசியல் கட்சிகள் விரும்பவில்லை.

இந்தத் தீர்ப்பில் கர்நாடகத்துக்குச் சாதகமான, பாதகமான அம்சங்கள் குறித்து விவாதித்து, அடுத்தகட்ட நடவடிக்கை குறித்து முடிவெடுக்க கர்நாடக அரசு தீர்மானித்துள்ளது. இதற்காக பெங்களூரு விதான செளதாவில் மார்ச் 7-ஆம் தேதி அனைத்துக் கட்சிகளின் கூட்டத்துக்கு மாநில அரசு ஏற்பாடு செய்துள்ளது.

முதல்வர் சித்தராமையா தலைமையில் நடக்கவிருக்கும் இக் கூட்டத்தில் கலந்து கொள்ள சட்டப்பேரவை, சட்ட மேலவையில் அங்கம் வகிக்கும் அரசியல் கட்சிகளின் தலைவர்கள், காவிரி ஆற்றுப்படுகை மாவட்டங்களைச் சேர்ந்த எம்.பி.க்கள், எம்.எல்.ஏ.க்கள், எம்எல்சிக்கள் உள்ளிட்டோருக்கு கர்நாடக அரசு அழைப்பு விடுத்துள்ளது குறிப்பிடத்தக்கது.